Saturday, March 16, 2013

මේඩ් ඉන් ශ්‍රී ලඞකා... ( ශ්‍රී ලංකා ඉස්පෙෂැල්)

   පොතුපිටිය පැත්තෙ ගිහිං කිතුල් පැණි හොයා ගෙන ආපු හැටි කලින් පෝස්ටුවේ කිව්වා මතක ඇතිනෙ.. ඒක කියෙව්වෙ නැති කව්රුහරි ඉන්නවනම් ඉතිං මෙතැනින් ගිහිං කියවලාම එන්න..

    ඒ ගිය ගමනෙදි ඔය කිතුල් මල ගැන ගොඩාක් දේවල් අසා දැන ගන්ට ලැබුණා.. ගොඩක් පරම්පරාවෙන් පරම්පරාවට වගේ ආපු මේ කර්මාන්තෙට දැන් කණ කොකා හඬළලා කියලා තමා අපිටත් ආරංචි උනේ.. ඒකට විවිධ විවිධ හේතු බලපාලා තියෙනවා. එකක් තමයි අද ඉන්න අලුත් පරම්පරාව මේකට දක්වන අකමැත්ත.. ඔය ගොඩක් පාරම්පරික කර්මාන්ත අභාවයට යන්න ලොකු හේතුවක් තමා මේක.. මොනවා කොරන්නදෑ ඉතිං, දැං කාලෙ ඉස්ටැයිල් එක්ක ඕවා ගැලපෙන්නෙ නැති කොට... මේක මේ අයගෙ ජීවන වෘත්තිය උනා කාලයක්. ඒත් ඒ නිෂ්පාදන වලට හරි මිලක් ලැබුනෙ නෑ.. ඉතිං ඔය පොඩි සොච්චම් මුදලකට ඔය කිතුල් ගස් බඩ ගාන්ට දැන් ඉන්න උන් කැමති වෙයිද මං අහන්නේ.. දැන් තියෙන්නේ සම්පූර්ණයෙන්ම සියල්ල මුදල් වලින් මනින සමාජයක් නොවැ.. 




  කොහොමින් කොහොම හරි මාත් ඔන්න කිතුල් මල් කපලා කිතුල් පැණි හා අනෙකුත් නිෂ්පාදන සාදා ගන්නා ආකාරය දැන ගත්තා.. ගෙදර ආපු ගමන් බැලුවේ කොහේද හොඳ මලක් වැටිච්ච කිතුල් ගහක් තියෙන්නෙ කියලා. කිතුල් මල විතරක් නෙවෙයි, පොල් මලත් ඕකට කියාපු භාන්ඩේ.. විශේෂයෙන්ම මේ පැති වල නම් ගොඩක් ප්‍රසිද්ධ වෙලා තියෙන්නේ කිතුල් මල් තමා.. ගොඩක් වියලි කලාපේ පැත්තේ සහ වෙරළබඩ ප්‍රදේශ වල ගොඩාක් ප්‍රසිද්ධ පොල් මල... ඔය විනාකිරි ( ඇසිටික් අම්ලය ) හදන්නත් වැඩියෙන්ම යොදා ගන්නවාය කියන්නෙ පොල් මලනේ...

   හරි හරි... වැඩි කතා ඔනෑ නෑ... අපි දැන් සූදානම් වන්නේ නිවසේ සිටම රා පොල් කට්ටක් සාදා ගැනීමට ය.... මං කිව්වේ පොල් කට්ටක් හොඳේ!

  පලමු පියවර තමා හොඳ මලක් වැටිච්ච ගහක් හොයා ගැනීම. ඔබට කිතුල් ගසක් සොයා ගැනීම අපහසු නම් පොල් ගසක් වුවද කම් නැත. එහෙත් මෙහි ලා විස්තර කෙරෙනුයේ කිතුල් මල සම්භන්ධවය. සෑම කිතුල් මලකින්ම පැණි ලබා ගත නොහැක. මේ පිලිබඳ විෂය ප්‍රවීණයා නිවැරදි මල තෝරා ගැනීමට දනී. කිතුල් මල තෝරාගෙන සිදු කරන රාජකාරියට අපේ ඇත්තෝ කියන්නේ කිතුල් මල පදම් කරනවා කියාය. ඔය කිතුල් ගහක මලක් පිපෙනවා කියන්නේ අවුරුදු දහයකට විතර සැරයක් නේ.. ඔය වැඩේට තෝර ගන්නේ නොමේරූ ළපටි මලක්. ඉස්සෙල්ලාම ඔය තෝරා ගත්තු මල අල්ලලා පට්ටා වලින් ගැට ගහනවා. එහම කරන්නේ මල විසිරිලා යන එක වලක්වන්න. ඊට පස්සේ මල ඉහලින් තියෙන අත්තක ගැට ගහනවා. ඔහොම තෝර ගත්තු මල දවස් තුන හතරක් තියෙන්න අරිනවා. එතකොට මල හොඳට තැම්බෙනවා. ඔන්න ඔහොමලු මල පදම් කරන්නේ හොඳේ..... ඊට පස්සෙ තමා කපන්නේ..


dinamina.lk
   ඉතා සියුම් ලෙස කැපෙන හොඳ මුවහතක් තිබෙන පිහියක් මල කැපීමට යොදා ගනී. මේ වැඩේට කව්රුත් කියන්නේ මල මැදීම කියලා. කිතුල් මලේ කෙළවර මේ පිහියෙන් කපා එතෙන්ට මුට්ටියක් එල්ලනවා. ඔය මුට්ටියට තමා තෙලිජ්ජ ( තෙලි දිය ) ටික එකතු වෙන්නේ. ඔය තෙලිජ්ජ කියන්නේ අමුතු දෙයක් නෙවෙයි. කිතුල් ගහේ ප්ලෝයම පටකයේ ගමන් කරන පලෝයම තරලය. ඒ කියන්නේ ශාකයට අවශ්‍ය ආහාර. ඔය තෙලිජ්ජ වල වැඩි ප්‍රමාණයක්ම තියෙන්නේ සුක්‍රෝස්... ඒකයි ඔච්චරටම පැණි රස...! මෙන්න මේ තෙලිජ්ජ ටික දවසක් දෙකක් ඔහොම තියෙන කොට ඉබේටම රා බවට පත් වෙනවා. ඔය වැඩේ අපිට නොමිලේම කරලා දෙන්නේ වායුගෝලයේ ඉන්න ක්ෂුද්‍ර ජීවීන් තමා. විශේෂයෙන්ම යීස්ට්... මෙයාලා මේ තෙලිජ්ජ වල තියෙන සුක්‍රෝස් එතිල් මධ්‍යසාර බවට පත් කරනවා.. ඒවට තමා අපි මේ රා කියන්නේ.. ගොඩක් වෙලාවට මේ වැඩේ වෙන්නේ මුට්ටිය ගහේ තියෙද්දී ම.. ඉතිං අපේ උන්දැලා ගහේ ඉඳන්ම රා ටික බීලා තමා බිමට බහින්නේ... දැං ඉතිං මේක කියවන උන්දැලා කිතුල් ගස් බඩ ගානවා එහෙම නෙවෙයි ඕං...

  දැං බලමු කොහොමෙයි කියලා කිතුල් පැණි හදා ගන්නේ.. මම කලියෙං කිව්වනෙ තෙලිජ්ජ ටික ගහේදිම රා වෙනවාය කියල.. ඉතිං එතකොට කොහොමද පැණි හදා ගන්නේ නේද... ඒකට අපේ අය නියම වැඩක් කරනවා.. ඒ තමයි අර මුට්ටිය ගහේ ගැට ගහන්න කලින් ඒක ඇතුලේ හුණු ටිකක් ගාන එක.. එතකොට රා හැදෙන්නෙ නෑ කියලයි එයාලා විශ්වාස කරන්නේ.. ඒකේ විද්‍යාත්මක කතන්දරේ මේකයි.. ඔය හුණු කියල කියන්නේ භාෂ්මික ද්‍රව්‍යයක්නේ.. ඉතිං ඕක මුට්ටිය ඇතුලෙ ගෑවාම ඕක ඇතුලේ යීස්ට් වගේ ක්ෂුද්‍ර ජීවීන් වර්ධනය වෙන්නේ නෑ.. මොකද ඒ ක්ෂුද්‍ර ජීවීන්ට භාෂ්මික පරිසර වල ජීවත් වෙන්න බෑ. ඉතිං ක්ෂුද්‍ර ජීවීන් නැතුව රා නිෂ්පාදනයකුත් වෙන්නේ නෑ... ඒ වගේම මලේ එල්ලපු මුටිටිය පරණ වෙන්න දෙන්නේ නැතුව ඉක්මණට තෙලිජ්ජ ටික අර ගන්නවා.. ඊට පස්සේ ඒවා හොඳට උණු කරනවා.. නියම පදමට උණු කළාම නියම පැණි හදා ගන්ට පුලුවන්.. 

  ඔය හදා ගත්ත පැණි වලින් කරන තවත් දෙයක් තමා කිතුල් හකුරු හදා ගන්න එක.. අර හදා ගත්තු පැණි ටික පොල් කටු වලට දාලා දවසක් විතර තියෙන්න හරිනවා.. එහෙම තමා හකුරු හදා ගන්නේ.. ඔය වැඩේට ගන්න පොල් කට්ටත් හොඳට පොලිෂ් කරලා එහෙම තමා ගන්නේ..

  රා වලින්ම තමා විනාකිරි නිෂ්පාදන කරන්නෙත්.. ඒකටනම් ගොඩාක් යොදා ගන්නේ පොල් රා තමා.. ඔය රා තවත් ටික දවසක් තියෙන්න ඇරියාම ඒවා විනාකිරි බවට පත් වෙනවා. විනාකිරි කියන්නේ අම්ලයක්. රා වල තියෙන එතිල් මධ්‍යසාර වායුගෝලීය බැක්ටීරියා මගින් ඇසිටික් අම්ලය බවට පත් කරනවා. විනාකිරි කියන්නේ මෙව්වාට තමා...

  ඔන්න ඔහොම තමා කිතුල් කරුමාන්තේ අපේ උන්දැලා කරන්නේ.. හරිම අලංකාර කර්මාන්තයක් තමා.. අපේ පැත්තෙත් කිතුල් ගස් සැලකිය යුතු ප්‍රමාණයක් තියෙනවා.. ඉස්සරනම් ඔය ගහක පිපිලා තියෙන මලක මුට්ටියක් වරදින්නේ නෑ.. ඒත් දැන්නම් ඒ ගස් පාලුවට ගිහිල්ලා.. මහා ජාතික අපරාධයක් කියලයි මටනම් හිතෙන්නේ. 




www.vidusara.com





Wednesday, March 13, 2013

කලවානේ කිතුල් පැණි සොයා ගිය ගමන

    මේක මේ මාස තුන හතරකට උඩදී වෙච්චි සිද්දියක්.. බ්ලොගේට දාන්ට කියලා හිතුනා.. කව්රු කවුරුත් දන්නවා ඇතිනේ ඉතින් සිංහරාජ මායිම ගොඩක් කිතුල් පැණි වලට ප්‍රසිද්ධයි කියල.. විශේෂයෙන්ම කලවාන පොතුපිටිය පැත්ත.. ඉස්සරනම් ඒ පැති වල මිනිස්සුන්ගේ ප්‍රධාන ජීවනෝපාය මාර්ගයක් උනේ මේ කිතුලේ තමා.. ඒත් දැන්නම් ඒක හුඟාක් දුරට අඩුවෙලා... ඒකට විවිධ විවිධ හේතු බලපාලා තියෙනවා...

    උසස් පෙළ එහෙම ලියල ඉවරවෙලා කරන්න දෙයක් නැතුව ගෙදරට වෙලා හූල්ල හූල්ල ඉන්නකොට තමයි මේ අපේ පැත්තේ එකෙක්ගේ ගෙදර පොඩි පින්කමකට කිතුල් පැණි හොයන්ට යන්න සෙට් උනේ... මිනිහ දන්නා අඳුනන එකෙක් කලවාන පොතුපිටිය පැත්තේ ඉන්නවා කියල කිව්වා... ඉතින් ඒ හිතවතාටත් දුරකථන ඇමතුමකින් එහෙම දැනුම් දීල අපි ලැස්ති උනේ යන්ට කියල... ඔන්න උදේ පාන්දරින්ම දෙන්නත් එක්ක සෙට් උනේ යන්න කියල. සහ පිරිවර කැටුව යන්නේ නැතුව මේ තුමාලා දෙන්නත් එක්කම හොර රහසේ තමා ගියේ.. නැත්තං උන් කට්ටියත් යන්න කෑ ගහනවා නොවැ.. ඇයි ඉතිං මුන් කිතුල් මලකටවත් ඉන්න දෙන එකක් යෑ.. අපි දෙන්නෙක් විතරක් යන හින්ද ත්, සිංහරාජ මායිමේ සුන්දරත්වය මනාව විඳ ගත හැකි නිසාත්.... ගමනට තෝරා ගත්තේ රෝද දෙක ය....


http://www.apeurumaya.lk/wp-content/uploads/2010/10/06.jpg


   ගමන ආරම්භ කරන විට උදේ හතට වන්නට ඇත.. රක්වාන නගරයට ගොස් එතැන් සිට යාමට තිබුනේ රක්වාන - පොතුපිටිය මාර්ගයේය. මෙය සුන්දර භූමි භාගයකි. මාර්ගය වැටී තිබුනේ සිංහරාජ වන අරණ මායිම හරහාය.. උදෑසන නිසාදෝ අමුතුම නිහැඬියාවක් ගැබ්වී තිබුනි. ඇත්තෙන්ම නගරයේ කොන්ක්‍රීට් වනාන්තර තුල ඇති මහා ගෝෂාව මේවායේ නැත. හරිම නිස්කලංක ය. මිනිසාගේ ඇස නොගැටී තිබුනේනම් කෙතරම් සුන්දර වනු ඇත්ද... රක්වාන නගරයෙන් පසු මාර්ගය ගැනද යමක් කි්ව යුතුය. මේවායේ ඇත්තේ තනි කෙලින් තිබෙන අධිවේගී මාර්ග නොව, වංගු වලින් පමණක් සමන්විත කඳු ය. ඇත්තෙන්ම මේවාට මහා මාර්ග යැයි කීවාට ඇත්තේ වංගු පමණි. මේ සියලු මාර්ග සාදා ඇත්තේ විශාල කඳු මට්ටම් කිරීමෙනි. කන්දේ ඉහලටම ගොස් පහළ බැලූ විට මුලු මාර්ගයම දැක ගත හැකි වන තරමටම පැහැදිලිය. කන්දක් නැග්ගොත් පල්ලමක් තිබේ යන කියමන සනාථ කරමින් යන ගමනේ හොඳ හොඳ පල්ලම්ද නැතුවාම නොවේ.. මේ කියන මොහොතේද අපි එවැනි කන්දක් නගිමින් සිටියෙමු. කන්දේ තරම කිව්වොත් හොඳින් කාපට් කර තිබුණු පාරේ බයිසිකලය ඇදුණේද මර හඩ ලා ගෙනය. ඒ නම් පිටුපස අසුනේ සිටි අලියාගේ බර නිසා විය හැක..

   මාර්ගේ දෙපස ගැනද යමක් නොකී්වොත් හිතට හරි මදියැයි හැඟේ. මාර්ගයේ එක් පසෙකින් සිංහරාජ වන අරණ ය. නිහඬ පතාක යෝධයෙකු ලෙස එය අපට දිස් විය. අනෙක් පසින් විශාල තේ වතු ය. මේවා එසේ මෙසේ තේ වතු නොව අක්කර ගණන් විශාල තේ යායවල් ය. මෙම දර්ශනය අමුතුම සුන්දරත්වයක් එකතු කරයි. ඒ ගමනේ ඡායා රූ කිසිවකුදු ගැනීමට නොහැකි වීම ගැන දැනුදු මා ලත වන්නේ එබැවිණි. අපි උදෑසන යන ගමනේදී දුටු මේ විශාල තේ වතු වල තේ දලු නෙලීමට පෙළ ගැසී යන පිරිස් හා සවස ආපසු එන ගමනේදී දුටු දලු ගෝනි හිස මත තබා එක පෙළට මහා මාර්ගය අයින දිගේ ගමන් කළ මේ පිරිස වට පිටාවේ සිරි අසිරිය තව තවත් වැඩි කලේයැයි මට හැඟේ.

   අපි පොතුපිටිය ප්‍රදේශයට පැමිණෙන විට උදෑසන නවය පමණ විය. කලවාන පොතුපිටිය ප්‍රදේශය යනු නගරයක්‍ නොව තවත් එක් සුන්දර ගම්මානයක් පමනි.. සුන්දර මිනිසුන් සිටින ප්‍රදේශයකි. අපේ යහලුවාගෙත් යාලුවාගේ නිවසට යාමට පොතුපිටියේ සිට තවත් අතුරු පාරක යෑමට සිදු විය. ඒ පාරේ ගිය හැටි සිහි වීමෙදී රෝද දෙකේ ඒවා පැදීම ද එපා වේ.. ඒ තරමටම මාර්ගය අබලන්ය.. අතරමග තිබූ පාලමකින් එගොඩ වීමට යාමේදී අපට එලොව පොල් පෙනී නොපෙනී ගියේ අර කලින් කී යාලුවා එතැනට පැමිණ සිටි නිසාවෙනි. නමට "පාලම" වුවද ඇත්තටම එය ඒ දණ්ඩකි. යකෝ! ඒ දණ්ඩෙන් කොහොමද බයික් එකක් ගත්තේ... එවේලේ අපේ පිහිටට ආ අපේ යහලුවා නම් දෙයියෙකි.. ඌට මේවා සිම්පල් වැඩ බව අපිට තේරුම් ගැනීමට වැඩි වේලාවක් ගත නොවීය. එම ඒ දණ්ඩ හරහා බයිසිකලය මා විසින් රැගෙන ගියේනම් බයිසිකලය මෙන්ම මාව සෙවීමටද කිමිදුම්කරුවන්ගේ පිහිට පැතීමට සිදු වනු නොඅනුමානය....

   අපි කලින්ම පවසා පැමිණි බැවින් මිත්‍රයා අප වෙනුවෙන් වෙනමම පිරිසිදු කිතුල් පැණි තොගයක් තබා තිබුණි. ඇත්තටම අපි කිතුල් පැණි සොයා මෙතරම් දුරක් පැමිණියේද පිරිසිදු කිතුල් පැණි ලබාගැනීමටය.. වෙනත් තැන් වල ඇත්තේ කිතුල් පැණි නොව බොරු ලේබල් ගැසූ සීනි පැණි ය... ඒත් අපේ එකාට මේ මදිය.. ඌ තවත් පැණි උවමනා බව පැවසීය.. තමා සතු කිතුල් පැණි සියල්ල අපට දුන් බව පැවසූ පොතුපිටියේ මිතුරා තවත් උවමනා නම් සොයා ගෙන යමු යැයි යොජනාවක් ගෙනාවේය.. වැඩි කතා නැතිවම කිතුල් පැණි සොයා යෑමේ මෙහෙයුම ආරම්භ විය... 

http://mirror.lk/sinhala/images/image_gallery/news/2013/feb/KitulTree_360px_13_02_07.jpg


   අපේ එකා රා ගුඩ්ඩා ය.. මිනිහා මේ වහින් ඔරෝ කියන්නේ කුමක්දැයි තේරුම් ගැනීමට මට එතරම් අපහසු නොවීය. මෙතරම් දුරක් ආපු එකේ රා පොල් කට්ටක් දෙකක් කටට දා ගෙන යන්ටෝන බං යැයි එන මග දිගට කිය කියා ආවේ මේකා ය... ඉතිං දැන් ඔය තටමන්නේ ඒකට බව මම දැන ගතිමි.. දැන් මේ කිතුල් මල් හා සම්භන්ධව රාජකාරි කරන පුද්ගලයන් ඉතා අඩු බව අපට දැන ගන්නට ලැබුණි. එබැවින් තවත් පැණි ටිකක් සොයා ගැනීමට පොතුපිටිය ප්‍රදේශය පීරීමට අපට සිදුවිය. අවසානයේ එළ පොට් එකක් හමු විය.. කිතුල් මල හා ආශ්‍රිත සියලු නිශ්පාදන එතැනින් ඉතා ලාභදායී මිලකට ලබා ගැනීමට පුලුවන් විය. මේවා ශ්‍රී ලංකන්‍ බඩු බං... මේඩ් ඉන් ශ්‍රී ලංකා යැයි කියමින් අපේ එකා වැඩ පටන් ගත්තේය... මා නම් උපතින්ම අමද්‍යප බැවින් පසෙකට වී පැණි හකුරු ටිකක් භුක්ති වින්දෙමි......  ආපසු එන ගමනේදී රෝද දෙක වත්තම් කරගෙන ආවේ හරිම අමාරුවෙනි. ඒ අන් කිසිවක් නිසා නොව පිටුපස සිටියේ එසේ මෙසේ අලියෙක් නොව රා කල හතක් බිවූ නාලාගිරි ඇතෙක් බැවිණි....

   කෙසේ වුවද සවස තුන හතර වෙද්දී ආපසු එන්නට හැරුනෙමු. ඒ අපේ මිතුරාටද කළ උදවු වලට අනේක වාරයක් ස්තූති කරමින්ය.. අපේ එකා හොඳ හැටි සප්පායම් වෙද්දී මම මේ කිතුල් මල හා සම්භන්ධ කර්මාන්ත ගැන ඒ විෂය ප්‍රවීනයන්ගෙන් අසා දැන ගතිමි. ඒ අවශ්‍ය වුවහොත් පොල් කට්ටක් දෙකක්වත් සාදා ගැනීමටය... මොකද අපේ පැත්තේද ඕනෑ තරම් කිතුල් ගස් ඇත.. මේඩ් ඉන් ශ්‍රී ලංකා නිෂ්පාදනයක් නිවසේදීම සාදා ගන්නා ආකාරය ඉදිරි පෝස්ටුවකින් කියන්ට බැරියෑ...

Saturday, March 9, 2013

෴ හන්තානට පෙම් බැඳීම ෴

  කොම්පූටරේ ඇහැට දැක්ක දවසේ ඉඳලාම ඉතින් හැමදාම අහන්නෙයි දකින්නෙයි වින්ඩෝස් කියන එක නොවැ. නරකද ටිකක් වෙනසක් කලොත්... ඔන්න ඕක ඉතින් හුඟ කාලෙක ඉඳල මගේ හිතේ කැරකි කැරකි තිබිච්ච ආසාවක් තමයි.. ඒත් ඉතින් ටිකක් දෙගිඩියාවෙන් තමා හිටියේ..




    කාලයක් වින්ඩෝස් එක්ස් පී පාවිච්චි කොළේ.. ඊට පස්සේ නොවැ 7 ආවේ.. ඒකත් දා ගත්ත.. ඔය අස්සේ ඉතින් ලිනක්ස් වල වැඩ කිඩ ටිකත් බලා ගන්ට උබුන්ටු ඩුවල් බූට් දාගෙන තමා හිටියේ..  ඒ අස්සෙ 8 ආවා... එක පාරටම වින්දෝරේ අමතක කොරන්නත් බැහැනේ.. බිල් මාමා මං ගැන මොනවා හිතයිද.. ඒත් ඉතිං අවුරුදු ගණන් එක තැන පල් වෙවී මේකක් බදාගෙන ඉන්ට පුලුවන්යෑ හැමදාම. ඔන්න ඔය අස්සේ තමා මේ මට හන්තාන ලිනක්ස් සෙට් උනේ.. නමින් එහෙම කිව්වට ඉතින් ෆෙඩොරාම තමා. ඒත් ඉතිං සිංහල නමක් හරි ගෑවිලා තියෙනවනේ. අරවායේ එහෙම නමක්වත් තියෙන එකක්යෑ... ඒත් ඉතින් හිතුවටත් වඩා මේක හොඳා... හී හී..
 
  මම කලින් හිතාන උන්නේ ඩුවල් බූට් දාගන්න.. ඒත් එතකොට අන්තිමේදී දෙකෙන් එකක් එක්කවත් හරියට වැඩක් වෙන්නේ නෑ.. ඒක හින්ද ඔන්න දෙයියනේ කියල සියලු දෙවියන්ට නමස්කාර එහෙම කොරල... හොඳ වෙලාවක්  බලල හාර්ඩ් ඩිස්ක් එක ෆොර්මැට් කොරාලා... දැම්ම නේ හන්තාන.. වැඩේ කොහොම හරි නැගලම ගියා.. දැන් වින්ඩෝස් දිහා ඇහැක් ඇරලවත් බලන්ට හිතෙන්නේ නැහැ නොවැ..  දුකයි..

   ඇත්තටම වින්ඩෝස් වලට වඩා ලිනක්ස් කර්නල් එක කොච්චර බල සම්පන්නද කියල තේරෙන්නේ ඒකත් එක්ක වැඩ කරනකොට තමා... වින්ඩෝස් වල කරන්න බැරි ගොඩක් වැඩ ලිනක්ස් වල කොරන්න පුළුවන්... ඇත්තටම ඇඟට දැනෙන්නේ වින්ඩෝස් එක්ක වැඩ කරන කොට නෙවෙයි... ලිනක්ස් එක්ක වැඩ කරන කොට..

   මමත් ඉතින් තියෙන ඇඟේ අමාරුවට හන්තාන දා ගත්තට මොකද නරකක් උනේ නෑ.. දාගත්ත ගමන්නම් පොඩි කරදර ටිකක් ආවා.. ලිනක්ස් වලට මෙච්චර කැමති වෙන්නත් හේතුවක් උනේ ඔය ජර මර ටික තමා ඕං.. :ඩී  යකෝ දාගත්තට මොකද මම ඉන්ටෙර්නෙට් යනකොට ඩොන්ගල් එකේ සිම් එකේ සල්ලි ඉවර වෙද්දී අලුතෙන් පැකේජ් එකක් වත් ඇක්ටිව් කර ගන්ටේ කොහොමෙයි මොබයිල් පාර්ට්නොර් එක වැඩ කරන්නේ නැහැනේ.. දෙයියෝ සාක්කි.. ඉන්ටර්නෙට් එක හැම තැනම පුරා දින දෙකක පමණ අඛණ්ඩ පීරිමකින් ඔන්න පුළුවන් උනා එල භාණ්ඩයක් හොයා ගන්ට.. මේකේ නම bam huawei mobile partner  ලිනක්ස් එක්ක වැඩ සුපිරියටම.. දැන් මොකටයි බය වෙන්නේ ඕං..  ආ ... අමතක උනා නෙව කියාන්ට... සිංග්ලිෂ් සිංග්ලිෂ්.... මම ඔය සිංහල ටයිපින් කොරන්න දන්න එකෙක්යෑ.. දන්නා සිංගිරීසියෙන් තමා ටයිප් කලේ.. ගූගලේ දෙයියන්ට පින් සිද්ද වෙන්ට.. ඇයී යකෝ මේකා  මෙච්චර දේවල් කරලා ලිනක්ස් වල වැඩ කොරන ime එකක් හදල නැති හැටි... කොච්චර සිංග්ලිෂ් සොට්වෙයාර් තිබුනත් ගූගලේ හදාපු එක තරම් මගේ හිතට ඇල්ලුවේ නෑ මොකවත්... ඔන්ලයින් ක්ලවුඩ් හරහා තමයි ඉතින් කොටා බාන්ට උනේ.. ඒත් ඉතින් ඕෆ්ලයින් උනාම බඩු... ඒකට තාම හොඳ විසඳුමක් නෑ හැබැයි ඕං... ෆයර් ෆොක්ස් වලටත් සිංහල ඇඩ් ඔන් එකක් දා ගත්ත.. ඒත් හිතට හරි මදි.. අන්තිමේ දුකෙන් හරි ගූගලේ හදාපු කොරෝම් බා ගත්තා.. ඒකට සිංහල එක්ස්ටෙන්ෂන් එක දාල තමා දැන් වැඩ...

   මලා... එතකොට ෆොටෝෂොප්!!!!!   ඒක නෑනේ මේකේ..මට අමතක උනානේ.. හැම වැඩකටම, හැම ජිල්මාර්ට් එකකටම ඕන වෙන සොට්වෙයර් කෑල්ල නොවැ.. ගිම්ප් කියන්නේ හොඳ ආදේශකයක් තමයි... ඒත් සමහර ජිල්මාර්ට් වැඩ කර ගන්ට බෑ...  ඒක නිසා වයින් වලට පින් සිද්ද වෙන්ට ඒකත් කොහොම හරි අස්සට දාගත්තා... දැන් ඉතින් මගේ ෆොටෝෂොප් ලිනක්ස් පවුලේ සාමාජිකයෙක් වගේ...

   ඔය ගේම් ගහන්ටනම් ඉතිං මයේ හිතේ එච්චර ආසාවක් නැහැ... ගේම් ගහන්ට ඉතිං සුපිරියි කියන්නේ ඉතින් වින්දොරේගේ බඩුනෙ... හ්ම් හ්ම්ම්... මේකෙත් ඉතින් වයින් වීදුරුවක් එහෙම පානය කොරල ඔය අඩව්වක් අල්ලන්ට බැරිමත් නෑ..

   කොහොමින් කොහොම හරි මගේ කොම්පූටරේ දැන් දුවන්නේ හන්තාන ලිනක්ස්.. හන්තාන ගගන රිලීස් එක.. ඒ කියන්නේ ටිකක් විතර පරණයි නෙහ්.. දැන් තියෙන්නේ සිතිජ නොවැ.. ඒත් ඉතිං ඒක බා ගන්ට මෙහෙට ස්පීඩ් ඉන්ටර්නෙට් නැහැනේ..
කොහොම හරි හන්තාන දා ගන්ටත් ලොකු හේතුවක් තිබුනා.. ඒ තමයි හන්තාන එක්ක බුරුතු පිටින් හම්බ වෙන සොට්වෙයාර් කන්දරාව.. ආයි පිටින් බා ගන්ට දෙයක් ඉතුරු කොරල නෑ මයේ හිතේ , ඔය බාම් හුවාවියත් ඕක අස්සටම රිංගුවානම්..!

මෙන්න මගේ හන්තාන.....















Sunday, March 3, 2013

෴කෙලෙස වේවිද.. හෙට දිනය෴


බලනු මැන අහස් කුස
සිසාරා නෙත් යොමා
විඳිනු මැන එහි සුවය
අනන්තය දෙස බලා
ලැබේ නම් පොඩි ඉඩක්
විඳින්නට ඒ සුවය
නැතිය තව විඳින්නට
මහඟු සුවයක් වෙනත්...
විඩා පත් ඔබ සිතට
අමා පැන් පොදක් වනු ඇත එයම
දහසකුත් එකක්
තුරු ලිය ගොමු දෙස
බලා සිටිය හැක සිත තුටින
එය අපේ සම්පත නොවේද
ගන්න එක් සුසුමක්
නැවුම් වා ගැබ සමග පෙම් බැඳ
ජීවයේ ශක්තිය එය නොවේද
එහෙත්
කිව මැනව
කෙලෙස වේවිද 
 හෙට දිනය!